Vicente, Cholo, Pipo y Pepín. (Artículo de Ismael María González Arias).

2009-01-30. Les Noticies

Va bien d’años escribí un artículu resaltando la importancia de Vicente Díaz como enllenapraos. Lo que n’Asturies, amás d’una bendición pal músicu y los sos oyentes, resulta ser un pecáu pa los críticos musicales en xeneral.

La bendición del éxitu, bien de músicos asturianos tan necesitaos d’ella. Por más que, los que nun la consiguen, dícente nun tar dispuestos a algamar l’éxitu a cualquier preciu. Paradigma al que siempre se-y pue responder cola anécdota que, ente bien d’ellos, s’achaca a Chesterton de que-y preguntara a una muyer si s’echaría con ella por un millón de llibres. A lo qu’ella contestó que por un millón de llibres nun-y costaría munchu esfuerzu. Pa, de siguío, Chesterton pregunta-y si s’echaría con ella por diez peniques. A lo qu’ella, bien solliviada, ofendióse:

-¿Quién piensa usté que soi?

-Lo qu’usté ye señora yá lo sabemos –siguió falando Chesterton-. Namás tamos negociando’l preciu.

Tuve esti vienres pasáu xintando con una montonera d’amigos que dende va años s’axunten en Casa Enedino de Lada. Acompañáu de Facundo Fernández, presidente de l’Asociación Güeria de San Xuan, organizadora del Concursu Cuenca del Caudal, averámonos al llugar nel que, ente bien d’otres persones relacionaes cola música asturiana, taben Vicente Díaz, Cholo Juvacho, Pipo Prendes y Pepín Robles.

Pepín Robles llevaba con él l’acordión. Bona parte del repertoriu de Vicente Díaz y de tantos otros yera d’él. Cantóse. Pero tamién la sobremesa yera llarga como pa facelo de repertoriu d’otros. Canciones que son parte de la música popular de la nuestra memoria. “Le meteque”, de George Moustaki, na versión impagable de Pipo Prendes. Nicola di Bari versionáu por Cholo Juvacho. Con toos echando una mano con tantes otres del repertoriu de Vicente Díaz que yá son tan populares o más que’l propiu “Chalaneru”, que tamién se cantó.

Pero esto nun ye artículu pa contar lo bien que lo pasamos, lo que xintamos, lo que bebimos y tol repertoriu que reinterpretamos a venti voces. Ye un artículu, na llinea de tantos otros qu’escribo, que me lleva a reflexonar sobre la profunda separación qu’esiste ente la música popular asturiana y la música que lleva años queriendo sélo y nun ye quién.

De la qu’escribí –como dicía, va años-, aquel artículu del que falaba al empiezu d’ésti sobre’l poder de Vicente Díaz como enllenapraos, llamóme pa dicime dalgo que, nel fondo yá sabía:

-Nun suelo ver na prensa nengún apreciu polo que faigo.

La razón tien raigaños hestóricos. Más allá de les tonteríes típiques que se dicen pa salir del pasu, la prensa de finales del sieglu XIX y de primeros del XX nun reflexa n’absolutu l’enorme éxitu de públicu y la tremenda influencia d’un cantador y músicu como’l Gaiteru Llibardón. Un fechu que, sieglu XX alantre, va siguir ocurriendo alredor de xente como El Presi, La Pastorina o’l propiu Vicente Díaz.

L’exemplu mesmu tenémoslu en casa. Con más de setenta años y más de cinco mil actuaciones a les espaldes, ¿quién vio un artículu en pofundidá nes secciones musicales de la prensa –esta incluyida- sobre un músicu y cantante como Cholo Juvacho? Y toi falando de dalguién que resume na so vida la hestoria mesma del rock and roll n’Asturies, como tamién el tránsitu hacia xéneros más populares. Yá que, el rock and roll, a pesar de tolos columnistes aficionaos a escribir y escribir sobre l’últimísimu boom, enxamás contó n’Asturies con grupos que representaran delantre d’un públicu lo mesmo que dellos de los citaos.

¿Quién vio siquiera una entrevista, tamién en profundidá, más allá de les obviedaes de siempre, d’un artista como Vicente Díaz? Dalguién que surde del ámbitu de la tonada asturiana, nel que recibió importantes primeros premios en concursos, pa convertise nun iconu de la música asturiana. Non nun iconu a nivel del críticu especializáu, sinon al únicu nivel nel que la música popular s’espresa: delantre d’un públicu. D’una montonera de públicu.

Esti domingu nel qu’escribo l’artículu vengo de lleer La Nueva España, La Voz de Asturias y El Comercio. L’abandonu, en xeneral, de la música asturiana ye manifiestu. Como verdaderes sucursales de les grandes discográfiques, acaba teniendo más relevancia un ridículu (en númberu d’espectadores) conciertu en Xixón d’un grupu pa entendíos que cualquier grupu asturianu.

Exemplos tengo a manta. Anbástame ún. Nun va más allá de mediu añu un críticu de reconocíu prestixu dicía sentando cátedra -como s’aveza nestos casos (un viciu columnísticu que tamién yo frecuento)-, que lo más friki de la música asturiana yera la figura d’un gaiteru.

Asina nos va.

______________________________________________

Creo que ya sabéis mis carencias, por ello no resultará rara la subida de este artículo (íntegro, no podía ser de otra manaera) del incansable "Ismael" sobre algo tan nuestro.

Si te has quedado con ganas no dejes de darte un paseo "gratificante" por su página: http://www.ismael.org/noticias/list/page/1